Skálholt

1.990 kr.

0 atkvæði




 

Sá hluti af stórvirki Kambans sem hér birtist er fyrstu tvær bækur höfundar, Jómfrú Ragnheiður og Mala domestica. Hér er sögð öll saga Ragnheiðar Brynjólfsdóttur og bókin nær þannig yfir sömu atburði og sagt var frá í óperunni Ragnheiði eftir þá Gunnar Þórðarson og Friðrik Erlingsson, lesari hér er einmitt Friðrik.

Jómfrú Ragnheiður kom fyrst út 1930 og var fylgt eftir á næstu árum með þremur bókum sem saman mynda stórvirkið Skálholt. Hér er ein þekktasta og dramatískasta ástarsaga Íslandssögunnar dregin fram í stórkostlegu bókmenntaverki sem hlaut þegar við útkomu frábæra dóma. Sagan hefur þrisvar verið endurprentuð en hefur nú um áratugaskeið verið ófáanleg.

Jómfrú Ragnheiður var dóttir hins stórlynda og mikilhæfa Skálholtsbiskups, Brynjólfs Sveinssonar (1605-1675). Á Skálholtsstað er ungur og myndarlegur prestssonur frá Hruna, Daði Halldórsson. Hann er í miklum metum hjá biskupi sem felur honum að annast um einkakennslu dóttur sinnar. Þegar grunur um ástarsamband fellur á Ragnheiði og Daða gerir biskup dóttur sinni að sverja eið að hreinleika sínum. Fjörutíu vikum síðar elur hún barnið Þórð Daðason.

Ragnheiður Brynjólfsdóttir er í meðförum Kambans sterk kona og gegnheil í ást sinni og viljastyrk. En í henni býr einnig stórlyndi og sjálfstæði sem ögrar kristilegu feðraveldi 17. aldar. Höfundur teflir hér fram sammannlegri baráttu ástar og lífs gagnvart öfgafullu og refsiglöðu kirkjuvaldi.

Bókarkápu prýðir mynd Gríms Bjarnasonar af Þóru Einarsdóttur söngkonu í hlutverki Ragnheiðar í samnefndri óperu.

 

Friðrik Erlingsson les.